للشاعر المرحوم جعيدير لخضر/ قصيدة “البيت الحمرة”

خيمة-أولاد-نايل-الجلفة،-التراث-العربي،-البيت،-ouled-nail

بن يوسف مويسي

هذه القصيدة من الروائع التي اشتهرت لناظمها الشاعر المجاهد الحاج لخضر جعيدير بن الدراجي (1942-2021) رحمه الله. وفيها يتغنى بالخيمة النايلية المعروفة بـ “البيت الحمرة” مع اعطاء لمحة عن نمط المعيشة وأخلاق البدو الرحل وإكرام الضيف والفروسية والحُرمة والغيرة على العرض ووفاء وعفّة المرأة النايلية.

ملاحظات عن القصيدة:

– كما هو الشأن في لهجة الجلفة بإقلاب الغين قافا فإن كلمة “باقي” في البيت الرابعة أصلاها “باغي”.

– هناك بيت فيه كلمتين دخيلتين على العربية وأصلهما فرنسي: وابيو رابح نوامر (numeros) في لكراص (courses) أي أن الحصان الذي يملكه قد كان أبوه حصانا ربح في سباقات الخيل.

النص:

البيت الحمرة شايعة من مصر لفاس ** سيدي نايل ورث لينا خلاها
صنعة بدويات فلجتها تملاس ** من معدن صوف وشعر خيط سداها
اكحل اسود والبدن ساطع بقاص ** جذابة بالون تسلب من جاها
اخرج للصحرا اذ باقي التحواس ** مبنية في طرف ضاية تلقاها

*****
إذا تسأل أنا نوريلك وش خاص ** وانعتلك من خصايل مولاها
فنطازي ديما علا بيتو حرّاس ** لا من يقدر ترعتو يتحداها
اذا قابلها ضيف يخرجلو تراس ** كلمة قرب في لسانو يبداها

*****
يڨدملو قهوة اتداوي وجع الراس ** عرف اخضر من شيح مصحوب معاها
في فرفوري مسربيه ما هي في كاس ** تريح تعب الڨوايم ينساها
بعد القهوة طعام من خدمة كياس ** طعم الحب يزيد للذات دواها
من دهان النعجه يسڨيلو بالطاس ** أماتو فالشيح ترعى مفلاها
نعج نياڨو للفلا راعيم خاص ** يصرح للبعد بيات حذاها
فحلها حساد الفحولا احمر دواس ** زبد القيض على الذروه غطاها

*****
وازرق عند البيت يلعب في لمراس ** عنقو جابي عل الفريسة خلاها
خلق معفي ما حرث ما شاف دراس ** صيل امو من وطن ريغة جبناها
وابيو رابح نوامر في لكراص ** عدة ماديات عل الخيل داها
سرج الفضة طابعو وركاب نحاس ** وتلمسان عليه مكتوب سماها
والطرحة عشب المناڨع زينه الكاس ** حمرها ابرير بغدير سقاها
اشعل وبري صنع مسبوقة لنعاس ** فوڨ ابيض همة الفارس يسواها
ومسلح ضد العدو رابط قرطاس ** بيه يرد الطايرة من بعد علاها
شفرة مرحي سيف ماضي للتڨصاص ** مخفية تحت النسع زين جواها

*****
محجوبه في البيت ردافت لخراص ** تحفظ عرضو لان غاب وخلاها
عفيفه ما تقبل الخلطه في الناس ** لو تسألها ما ترويش سماها
بنت الصحرا مثلها جادي حساس ** ما يقبل بالقواشي يفلاها
عيونو تحت الحواجب حب رصاص ** من جعبة ڨتال كافي مولاها
سجلنا لبيات على بنت الڨنطاس ** ابيات الشكر النايلية تسواها
غالي سوم ابياتها مهومش رخاس ** لا من يقدر بالدراهم لشراها

*****
لخضر جعيدير من كاتب لنصاص ** مهدية لاولاد نايل خلاها
نختمها بصلاة طه سيد الناس ** اللي غدوة لشفاعتو نترجاها

 115 المشاهدات,  1 شوهد اليوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *