شعر الرثاء … أم جلفاوية ترثي ابنتها المتوفاة بالسرطان!!

الشعر الشعبي الملحون النسوي الرثاء -تراث-عربي-هلالي-إدريسي-الجلفة-أولاد-نايل-Ouled-Nail-

يا ربي يا خالقي وأنت تعلم *** ويا عالم الأسرار وأنت حَقّاني

راني نطلب فيك نفسي تتألم *** تغفر لخيرة بحقّك يا سلطاني

كانت خيرة الزايخة قا تتـنَسّم *** كي عُرف النعناع ريحو شَهّاني

تطلع مثل الشمس بيها تـتـنَعّم *** تكسي ڨاع لارض بكل لَـلْوَاني

حتى في الحديث تعرف تتكلم *** وهذا مَعطى الله ماهو إنساني

كانت في الجمال آية يا مِسْلم *** بدر امنـوّر في السما راهو زهّاني

خصايلها املاح يا رايح أفهم *** ما فيهاش العيب … أمر رباني

كانت مثل العودة يا فارس لجّم *** وما اتْحَبّرش خلاص من عندي هاني

حكمة ربي خالقي زال النعم *** والمكتوبة امْجَرْدة لا من نوّاني

جاها مرض اصعيب لا من يتكلم *** حَيّر الطُّبّة والرقّاية ثاني

فرحانة بالمرض ماهي تِتْذَمّم *** وفي نفسها ڨايلة (ربي آتاني)

كل الناس اليوم عنها تترحم *** تدعي بالغفران بجاه العدنان

هذا أمرك بالعالي ما نندم *** ورحمة ربي كاملة عنها ثاني

خلاّت “ابراهيم” بِنْها يِتْلَطّم *** وبضحكاتو ڨال لا من عزّاني

بدا اليوم يدوّر وهو يتمتم *** واتكلم وڨال ماما ورّاني؟

نطقت ليه “امباركة” غير اتكلم *** وأصل الكبدة تولد مرة ثاني

الشاعرة (ر. أ) حفظها الله

 217 المشاهدات,  7 شوهد اليوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *