يا من جيت تسال نعطي لك لخــبار *** نحكي لك ع العرش نوريك اوصافو

من بكري معلوم فيه ابطال اخيار *** ذوّادة ع الحــوض واحد ما حــافوا

فيهم ثَمْن اصناف هاهم بالتـــعبار *** يا ســـايل ع العرش تقصد صنّافو

الله يبــارك قبل ما نذكر لشـــعار *** وصلاة الرســــول للعرش احقافو

تلقى فيهم سيف بو علقــــة بتّــار *** سمّــــو نافذ والسّـــقم جا مــردافو

ما يحتاجش تشحذو مســنون بنار *** ومهنّد مصقول ترقــــاق اطــرافو

يلمع برقو في السّما ضو الصنّار *** بلا ما شفتو تعـــرفو من تحفــــافو

ماضــــي ذبّــــانة محكّر للتحبار *** واللّي شــــافو فيـــــد مــولاه يخافو

قاطع ضربة كانهي ڨصّّة منشار *** حـــدّو فتّــــات الحــديد اذا ســــافو

إذا حــــــدّك لا توجّــــدلو عقـار *** واستنى دقّــــــــات عمرك يوقـــافو

اذان ازّرف ع اللحم يقطع لهبار *** ماضي الشفـــــرة ما يكودش زرّافو

وفيهم بوصيحة رصاص رباط الدار *** ويــح اللي قصدو ايامو يقصافو

مسقّم قرطــاسو مــوالم للــــزيّار *** وسلاح الفــــوار والـــم لصــــنافو

تحتو بوشقــــفة على الفزّة يشطار *** امنعّت معلــــوم ســــوّل عــرّافو

ايلا دق نقول ترشــــاق المســمار *** ايفتّت لحم الحوت بين اضــــلافو

يسهل قاع اللي عراضو للتكسـار *** ماكانش من شي يقــــــاوم للهــافو

يتفتّت دونو اللي ضاري عـــزبار *** يشّـــربل دمّـــو يعــــدّز نشّـــــافو

وفيهم بوروبــــة مزرقط دار بدار *** من بكري معلـــوم ويح اللي شافو

حـــــاذق نظرة ما تفيد معاه احذار *** نابـــو يلمع والسّقم بين اعكــــافو

يحط الناب على اللحم قدّامو طــار *** ملّي مسّـــــو ما تجبّرش انتــــافو

يقصد للحـــــوتة يدمّرها تدمـــــار *** انيــــــابو وسط الجــواجي يتلافو

ايلان تلفّت تعــــرفو عـــاتي جبّار *** واحـــرش في الخزرة يخبّر قيّافو

وفيهم بوزرشة الحاذق في لطيــار *** يرتـع في لجـــــوا رياشـــو يترافو

حد المخلب في اللحم يعمل تفــزار *** يا كب الي جـــات ما بين اكــــفافو

يقطن ما بين المواسح في لوعــار *** ويدرّب فتخو على صيد اســـــلافو

والخامس واد ان حمل سيلو يغزار *** رعدو زمجر هاج من كثر ازعافو

اســـوابق يبرير وتوالي فـــــورار *** موجـــــاتو فرسان ع الشارد حافو

يسلم منها من شنق قـــاطن لوعار *** ولّا نقــلك طــــاولاتو في كـــــــافو

تظهر بنياتو على ضــو الصــــنّار *** لايح زبدو عــــايمة بيـه اصفــــافو

اسّيســر سيلـــو سرع زادو تحدار *** خلّى من خلـــــفو مقـــــادر يسّافو

والسادس مزن ان خرج زيمة يقدار *** امدلكــم يكحــــال نيّـــل جـــرّافو

مرعت بيه نجوع كانت في القيثار *** بايت طول الليل شاعـــل رفـــرافو

زين الجرّة في اللهب مرجو يخضار *** يغدّي اليابس كي تتحط اعـــرافو

ايخلّي في الصيــــف من خلفو نوّار *** تخمر كلّ ســــايبة من رعّــــــافو

ايعشّي مفــلى البهـــايم في لكــــدار *** من ريحـــــو تلقى الثوابت يخفافوا

والسابع ضد العدو كــــــاسح قهقار *** ويح اللي يعنـــــــاه جا في مندافو

زايد ع الشجــعان بجباوة وافخــــار *** خلّاف الفرسان من خلف اكــتافو

تتلكّـــح عينو على يمـــنة وايســــار *** عديــــانو من شوفتو جملة طــافوا

ترعدت قاع اوصــــالهم عاز الدبّار *** قبل اللا شافوه من هـــولو خـــافوا

عودو زين مطـاوعو جاب المشوار *** من تربيــت يدو مقيّــــد لحـــــرافو

امخيّر صـــيلو على كل الأشــــوار *** امخوّض في ماه عارف تســـرافو

اذا ماج يخلّــــف اسراب القـــــبّار *** عملت جـــــــرّافات قطّات اردافو

عنقو جـــابي عــانق مواسح لوعار *** سيقــــانو مثل القلــــومة يرهـــافوا

ينهم حسّـــو تسمعو صـــادي نقمار *** نخلات سعــــــودو تخبّر وقّـــــافو

بادرتو في العرض فاقت عشر اشبار *** هاتـــولي من يعجبو عود اخلافو

يهمل في خصلو اللّي ضاري دوّار *** وتعنقـــد ع الليمنـــة لاح اســــرافو

ما فيهش زقبة تحد اطيــح ايســــار *** ولا وسط العنــق شدّت شرشـــافو

تسميرو مــــوزون قد الحافر صار *** يعمل هورة في الحجر لاح اسخافو

ما يقبلش السّــــرج عن ظهرو ينهار *** ما يقبل شكّـــال عــــاني بكـــتافو

يتقيـــــزب تلقاه في الفــــزة نعّـــــار *** ما يحمل لمس الركاب وتقــــرافو

جوفـو خــاوي ما تحدّوش النظّـــــار *** تحــــلف ماذاق الغدا من عـــلّافو

بعد ثلث حيصات عامـــو لــــوّل دار *** ارباعي عنو الفرســــان اتهـــافوا

في الخزّة يخفـــاف تسّخلــو طيّــــار *** ارجولو بين السمــــاوات اتوافــوا

اذا عــض الفـــاس يربيلك لــــــدوار *** تلقـــى لـــرض مزيقة من تكوافو

يعشي في البرمة على رمشة لنظــار *** ويطــــاوع لمس اللجام وتســوافو

والثــــامن مولى كرم غــــامق لبحار *** مـــول الغيرة ما يخيّب من ضافوا

يلهم بفضــــالو العادز والمشــــــرار *** عند ايام الضيــــق تكثر سخّــــافو

يكـــــرمهم جمـــيع لامن فيهم بــــار *** لي منحــــو ماعادش يمد اكــــفافو

كل انهــار الناس عندو من لبكــــــار *** دايم مجمــــــولين ع الباب اصّافوا

امكـــــارم ذ العرش عدّازة لسطـــار *** سوّل قاع الناس تعطيك اوصـــافو

لو نحكي بوصـــــافهم للّي حضّــــار *** قــــالو ذا مهمـــــوك ياسر تخرافو

رجالة زينيــــن كرامـــا واحــــــرار *** اذا عمــــــلو هدّة على القاشي نافوا

آويح اللي قشّـــهم يسقــــــوه امــرار *** يذوق اسقام الرهج ورقاتو صــافوا

حتى ولو كان في الســـابق يخضــار *** ايعشّـي غرســـــــو يذرّي سفسافو

كسّـــــارين اللي عليهم ظلمـــو جار *** نيفية وقبــــــول وعـــداهم طـــــافوا

المدّكتـــــر ليـــه قصّــافين اعمـــــار *** واللي يعــــــدز بيــه جملة نرآفــــو

وما نرضـــو للي يعاشــــرنا بالعـــار *** في الندهـــة تلقى الشجعان اخفافوا

ونساهم شمس ان ضوات عقاب افجار *** نحّت غوط الليل ولوات ڨنــافو

اترفعـــت مانــــالها عــــاتي جبّــار *** تسّــــوكى علّي نظـرها وتعـــــافوا

ثمد مرهّج تلكحك تمسى مضـــرار *** ويطيحــــو ورڨات سجرك يخرافوا

طلقت رايب طاح فوق الركبة مــار *** غطّى البــــدن عليه دلكـــم جرّافو

ما يوفيـــشي زينها من هـو عبّــــار *** ولو بالبحـــــار تتخط احـــــــرافو

غير المحـــرم شــــاردة منو نفّـــار *** ما تركن محـــــــــال لعباد خــلافو

هذا وصـــــف ولادنا يا من تختـــار *** شرح لمعلمــــنا نفيدك باصــــنافو

هذا ورث لجــــدنا من قبل ادهـــــار *** سيدي نايل تعرف الناس اعــرافو

يرجع نسبو في الكتب لعلي حيـــدار *** زين النسبة واش من عز اخــلافو

هذي مكـــــريمة من الرب القــــهّار *** سقّم حوض العرش ولملى قــرّافو

الشـــاعر محفــوظ نظّم جاب اشعار *** جـــايب قولو عامرة بيه اصحافو

يطلب في المـليك مـــــولاه القهّــــار *** يحفـــظ هذا العرش وينح خــلافو

 381 المشاهدات,  1 شوهد اليوم