بقلم الشاعر جلال محمد/ قصيدة “توحشـــت أولاد نايــــــل”!!

يـا ذ الفارس وين بحصانك منقول         يــــا قاطــع قُطــاعــة الغيــم البــاني

مـن عندي لو كـان تـدي هـذا القــول        وتســـال علــى كـل ناسي ووطاني

تــوحشت أولاد نـــــايل والمـرحول         ذي مــدة مــن عندهـم لمن جــاني

يـــــــــــاذ الفارس واه فيا عز القول         مـــــاقاسيت همومي قلبي وحزاني

حين ان ينطـق قــالي مــافـاد القــول         كثــرت عــليا ســـوالك عيــــــاني

يـــــامراهـــا دونهم وعرة وســهـول       غيـــر البـارح جيت من برك عاني

بعيني شفت نجع في الصحراء مجمول        مـتقابل دوارهـــم في لصحـــــاني

نــجع مــدلل قا مع لصحــان يجــول        مـــــا يرتع في بـــر مرعاه مداني

يتخيــر بــر العفــاء عشبــو مغسـول        مــتفتـح وردو ربيــعو زهــــانــي

ونــياقـــــو فيــها اللقحــة والمخــلول        وعشرات وفيها أمــات الحيـراني

الليـــــل البــرد يزبــدو فيها لفحـــول       زبــد الـغيض عـلـى ذراهم متقاني

تسمع في صوت الجمال تقول طـبول        وضعيف القــوة مـن القطعة جاني

 وبــعيني فــي نجــعهم قطعات خيول       هــلها عـنهم مــا يعــزو لــثمـــاني

ســـاعة ويفـزو على طرف المرحول       وإبن الصيل يعود في لرض يقاني

مــا كــادو صــيد الخلا لا جاء منقول        تسميرو يرحــي الحجر الصواني

جــوفــو عــالي ع القفل طالع مسقول        وسبيب الرقبة على طرف مقـاني

ســرجــو بالمجبود تــرقـــامو معدول        طباع الطرحـة والركاب تلمساني

كــسبو فــارس يشبــه البدر المكــمول        يــوم الشــدة بيــه يخــرج عيناني

زيــد الخيمة ضـــرك فيـها واش نقول        البيت الحمــرة يكــسبوها لعيـاني

قسمتـها ذيك الطــرايق عرض وطول       عن لطراف تزيد همة وأحســاني

زرابـة ومــخاد وغــراير وحـمــــول        وفــراشات تريـــح الــلي  تعبــان

كســبو حــطـة كــل مافيـها مــعـــدول        مــنها قــع اللــي نشـــفو زهـــاني

كــــل ليلة دوارهــم يمسى مـــــجمول         تــــايه عن عشب المراسم متقاني

فيهـــم بدويات تفاجـــي اللي المــعلول         مريولة مطــــاق يشريها غــــاني

ذهب مصفي صيلها بنت الأصــــــول         نـاضوا على الحشمة وهم صبياني

مـاترضالك فعل إلي مـــــاهو مـــقبول        عـــــايز حتى خيالها ع الجـيراني 

مــاتتبرج تلبس الكـــامل في الطــــول        ع المناكب بثرورها طـــاح مقاني

خلــــخال العذراء على العاقب مصـول        حـــتى على البعاد حــسو دوانـــي

بنات الصحراء زينهم واضح مكمــول        فيهــم صيغة مـــن طباع الــغزلاني

ورد مفتح فـي الثرى برو مــــــحمول         ليهــم صفات للجمال الحقانـــــــي

يا الفارس ليك المزيـــة في ذا القـــول         في ذا المـــرة راك فاجيت أمحاني

هاذوك أهلـــي نجعهم شفتو مــجمول        عنهم مشعــال الوحش راه قدانــــي

نـــــــاس الهدة والكرم بابو مـــحلول         رفــــاعين اللي غدا ليهم جــــــاني

 33 المشاهدات,  3 شوهد اليوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *