الشاعر هزيل هزيل … من محاورة الشمعة إلى محاورة القمر!!

الشاعر الشعبي لهزيل الهزيل زنينة الجلفة تراث عربي هلالي إدريسي الشعر الشعبي البدوي الملحون أولاد نايل Ouled Nail

الكاتب/ عدة خلوفي

أثرت فيه قصيدة عبد الله بن كريو :

ڨمر الليل خواطري تتونس بيه *** نلڨى فيه أوصاف يرضاهم بالي

فنسج على منوالها هذا القصيدة التي عنونها بـ ( الڨمر اللي في السما) …

بن كريو استأنس بالقمر … بينما استأنس القمر بشاعرنا فبثّه حرقته ولواعجه وشكى إليه ألمه وحاله مع محبوبته الشمس … الشاعر هزيل هزيل، المولود عام 1975، من شعراء زنينة المعاصرين ..

نص القصيدة: الڨمر إلّي في السما

الڨمر الّي في السما راني نشتيـــــه

يشبه حالو في المحبة كي حالــــي

باصرتو ڨداه ليلة ننظر ليـــــــــــــه

حدثتو واش راه في الحب اجرالــي

في السابق عندي خليلة تشبه ليـــــه

ولى سهروا في الليالي يحلالـــــــــــي

انعدّي ليلي نبات نقسّم فيــــــــــــــــه

نبني معاه اقصور تعلى تهوالـــــــــــي

اللي سايل عن حالتي ذركة نوريـــــــه

عني طال الضـر كثــــــــرت اعلالــــــي

ضر معاشر كبدتي وجهي فانيـــــــــــه

صابر للحمـّة الشديــــــــدة تسنالـــــي

نتأمل في ذا الڨمر واش مضوّيـــــــــه

جيــــت نســـول فيــه من كثر اهبالي

مهبلني كي نحدثو ونراعي ليــــــــــــه

نحكيلـو بالهــــــم الأول والتالـــــــــــي

خايف عنو لا سحابات تغطيـــــــــــــــه

واذا غاب اضيــــــاه يكثــــر تخبالـــــي

انطّڨ ليا ڨالي همك خليـــــــــــــــــــــه

ذركة نحكـــي نا بهمــــي وشغالـــــــي

من بكري ونا الهم انعدي فيـــــــــــــــه

همك وين ايبان ياذا البوهالـــــــــــــي

همي ڨاع الناس ماتقدرش اعليــــــــه

نا مليك الحــــــب بمحانـــي جالــــــي

من شاو الدنيا الحب انصـــارع فيــــه

يضعفـنـي حتـى انولـّـــــي هلالــــــــي

حين نْجبر صحتي تظهر من هيــــــــه

المحبوبــة اللي نحبهـــــا يا دلالـــــــي

اذا طلعت تعشّي على ضَوّي تخفيــــه

ماتبقاش انجوم تبڨــــــص وتلالـــــــي

نا اشمسي سلطانة، الكون تساويـــــــه

حاشا اللــــي صُلاّح نابــــي ووالـــــــي

انتبع فيها النهـــــــار مع ليليـــــــــــــــه

هذا وقت اطويل مارحمــــت حالـــــــي

مـــــا ڨــالت ننتاظروا ولا ناتيــــــــــــــه

نسمع قـــــول اللي تمحـّــــن عن جالـــي

حــدّثت اعليها جمــــيع اللي نشتـــــــيه

من كــل الأجنـــاس نســــوة ورجالـــــي

ڨلت اعليها شعـــر ما ينظم مثليـــــــــه

غير الشاعر صــــــاحب الريم الفالـــــــي

اجميع العشــــــــاق قولي تكتب فيــــــه

كل اقصايد شــايعة ذيــــــــك اقوالـــــي

اللي هو محبوب ڨلبو ســـامح فيـــــــــه

إذا هُوَ صبّـار يصبــــــــــر كي حالــــــي

مـــــــــاذا عدّيت الربيع مع صيفيــــــــه

خريفات وشتـــوات ما تتحصالـــــــي

اللي ما يعذر حــــالي ربي يهديـــــــه

ايلوّم عني قا لي عوز الوالـــــــــــــي

اللي نحكيلو ما صرالي ونورّيــــــــــه

ينسى همو مايزيــــــدش يلقالــــــــي

مني راه ايخاف ضري لا يعديــــه

مايرفد عينو وينظــــــــر لتوالـــــــي

يا شاعر دير الصبر علْلِي تبغيـــــه

منك شفت اكثير ماصبت امثالـــــــي

واحد شفتوا مع احبيبو فـــارح بيـــــه

ڨضاو الأعمار زهــــو و دلالـــــــــــــي

واحد عنو مات من كان امسلّيــــــــه

وخْرين فرْقُــوا بينهـــــــم العذّالــــي

يعجني الصبّار كي مثلي نبغيـــــه

دايم صامــــد بصـْـــــبَر دار بحالــي

تلڨاني صبّار علي حبي فيـــــــــه

ولو ريح الشوق اتهــــب اتوالـــــي

هذا حال البدر همو ما يخطيــــــه

الليالـي ظلـمة، الليالي يزهى لــي

مولى ذو لبيات اسموا ما يخفيــه

الشاعر هزيل ناظــــــــم لقوالـــــي

الإدريسية سكنتو ثمة تلاقيــــــه

وتلاقي فيها احبابــــــي واخوالـــي

الڨمر اللي في السما راني نشتيــــه

يشبه حالوا في المحبة كي حالـــي

 88 المشاهدات,  1 شوهد اليوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *